Isumat.com/8:17AM, May 17, 2020
Nanawagan para hin bulig ngada han mga bungtohanon hi Mayor Boie Evardone han Arteche, Eastern Samar. Ini nga bungto in nag-antos gihapon hin makarimadima nga distroso durot ni bagyo Ambo.
Dida han iya facebook account, hi Mayor Evardone in nag-awhag nga unta may magpadangat hin hinabang ha ira lugar kadungan han iya panawagan nga ig-upod an iya bungto ha pag-ampo ha Makagarahum dara han krisis nga ira yana gin-aatubang.
Iginsumat han alkalde nga an gin-andam unta nga bugas nga igpapanhatag in nahulos han uran nga iginpusdak han bagyo, sanglit nagkukuri hira panhatag hin relief goods.
Iginpatapod niya nga ginbubuhat han iya pamunu-an an ngatanan basi matimangno an iya nasasakupan nga mulopyo. Nanawagan hiya han mga taga-Arteche nga adto ha iba nga lugar nga deri mabaraka kay waray nahi-record nga naawat an kinabuhi dara han bagyo.
Damo liwat nga residente an narub-an han ira kabablayan ug nagkahihibang an mga higamit. Nagpapabilin nga waray kuryente ngan waray signal han kumunikasyon ha Arteche. Ini nga bungto in sapit la han San Policarpo kun diin syahan nga gin-umpagan han pwersa ni Ambo.
An mga taga Arteche in napakadto pa yana ha Dolores basi la makatawag ha cellphone ngan igka-istorya an ira mga paryente nga harayo ha ira. Sobra usa ka oras an byahe tikang ha Arteche ngadto ha Dolores. #(KEVIN SIOSANA)
