Isumat.com/Hulyo 26, 2023
Pira nga kabablayan ha Hilongos, Leyte an nagkadidistroso han pagdagmalan hin makusog nga hangin kagab-i, Hulyo 25, 2023.
Ha impormasyon nga nahikay han IsumatNews, pasado alas 7 han gab-i han tigda nga mag-aliporos an hangin ngan posible buhawi an naka-igo han dako nga parte han bungto.
Partikular nga nag-antos hin dako nga danyos an pira nga kabablayan ha Brgy Western han nasabi nga bungto kun diin nagkatutuklap an atop ngan nanhipalid.
May mga behikulo nga nadanyos tungod kay nahulugan han nagkalupad nga mga yero.
Nagkatutumba gihapon an pira nga puno hin kahoy.
Tungod han makusog nga hangin, nawarayawan gihapon suplay hin kuryente an munsipalidad.
Waray nahisumat nga nasamaran o naawat an kinabuhi dida han nasabi nga insidente.
Nananalinguha an LGU nga katagan hin kadagmitan nga ayuda an apektado nga mga residente labi na an paghatag hin temporaryo nga ma-uukyan hadton nagkaguguba an puy-anan.#
