Isumat.com/Pebrero 22, 2022
Na-aresto han mga tinubyanan han balaud in usa nga konsehal hin barangay ha Calbayog City nga suspetsado hin panmusil didto han nasabi nga syudad.
Ha report han PNP Regional Office, ginkilala an suspetsado nga hi Alejandro Wahingon alyas Anling, 59 anyos, inasaw-an ngan kagawad ha Brgy Olera.
Hi Wahingon in nakwelyuhan dida han operasyon ha Purok 1, Brgy Aguit-itan, Calbayog City hadton Pebrero 20, 2022 pinaagi han mga tropa tikang ha Regional Special Operations Group, Calbayog PNP, ngan 43rd Infantry Battalion han Philippine Army.
Hadton Pebrero 18, natabo in usa nga shooting incident didto han lugar ni Wahingon ug an mga testigos an positibo nga nakakilala ha iya nga amo an nanmusil.
An konsehal in detenido yana ha Calbayog City PNP ngan gin-aandam na an mga kaso nga igsasalawad kontra ha iya.
Kasumpay hini, gindayaw ni PNP Regional Director BGen Bernard Banac an kapulisan, kasundaluhan ug an mga sibilyan nga nakigsumpayan ha mga otoridad han ira paningkamot nga madakop an nasabi nga gintatahapan.
Sumala kan Banac, kun pirmi magbibinuligay an publiko ug an mga otoridad, waray duda nga mapapaslak ha karsel an mga suspetsado ngan makakab-utan an hustisya. #
