Isumat.com/5:53PM,April 27, 2020
Umabot na yana hin 13 ka tawo an nag positibo han corona virus ha Rehiyon Otso. Ini an iginpasamwak han DOH-Region 8 yana nga alas 5:40 han kulop, Abril 27, 2020.
Sumala kan Regional Director Minerva Molon, unom ka tawo an nahidugang han record han Confirmed Covid Patients ha aton rehiyon, sanglit umabot na ini ha 13 ka tawo ngatanan.
Ini nga bag-o nga 6 ka tawo in tikang ngatanan ha Tarangnan, Samar kun diin iginka-urusa hira han tulo ka tawo nga tikang han nasabi nga bungto nga naha-una na nga natapnan han virus.
Ini nga mga bag-o nga positibo amo an masunod: Patient #8- lalaki 28 anyos; Patient #9- babaye 45 anyos; Patient#10- babaye 29 anyos; Patient #11- babaye 72 anyos; Patient #12- lalaki 27 anyos; ngan Patient# 13- lalaki 30 anyos.
Dara hini nga nagtikadamo na an positibo han virus ha Tarangnan, gindeklarar na han DOH nga mayda na Community Transmission han kagaw han nasabi nga bungto.
An 72 anyos nga positibo in igbabalhin ha EVRMC-Magsaysay(Tacloban) tungod han iya edad ngan kinahanglan hin mahugot nga monitoring, samtang an lima nga iba an igpapabilin la anay ha Tarangnan Community Hospital komo Isolation Facility tungod kay ini hira in maupay an kahimtang han panlawas.
Ini nga mga bag-o nga nag positibo in lakip dida han 132 nga samples nga ginpadara ha Cebu hadin Abril 24 para han confirmatory test. 92 han samples in tikang ha Tarangnan ug unom an nag positibo. #
