Gin pupuntirya han taga Ormoc City nga hi Johnriel Casimero nga hiya an magin kampeon han bantamweight division ha tulo nga magkalainlain nga boxing organization. Hapagkayana hi Casimero amo an hadi han World Boxing Orgnization (WBO) bantamweight class, ngan maniningkamot hiya nga agawon an mga titulo ha parehas nga dibisyon tikang kan World Boxing Association (WBA) ngan International Boxing Federation (IBF) champion Naoya Inoue han Japan.
Hira Casimero ngan Inoue in magbabanggaay ha Las Vegas hiton Abril 25 kun diin nakataya an ira mga titulo ug an magdadaog amo an magigin kampeon ha bantamweight han WBO, WBA, ngan IBF. An Ormocanon in nagkakapot hin record nga 29 nga daog, 20 nga knockout wins ngan 4 nga perde, samtang an Hapones in waray pa perde ha 19 nga away ngan 16 an iya ginpalunay ha ring.
Hi Inoue an gin tutudlok yana nga usa han “best pound for pound fighter” ha bug-os nga kalibutan ug ginbansagan hiya nga “Monster” dara han iya abilidad nga pagkastigo ngan pagpakaturog han iya mga kaatbang. Pero nagsering hi Casimero nga diri hiya nahadlok kan Inoue ngan iya inaabat nga iya peperdihon hi Inoue ngan tatawagon hiya nga “Monster Buster.”
Kun aton manunumduman, hi Casimero amo an dehado han iya laban kontra kan anay WBO champion Zolane Tete, pero an ginpapaboran han mga eksperto nga African champion in ginperde ni Casimero pinaagi hin 4th round knockout hadin Nobyembre 2019. Hi Casimero nga mayda alias nga “Cuadro de Alas” in nagin world champion na hadto han lightflyweight ngan flyweight divisions antis hiya sumaka ha bantamweight.
Matuod dako nga ayat ini hi Inoue kay diri la ini harumamay nga boksidor kay bisan ngani an beterano ngan makarit nga hi Nonito Donaire an ginperde han Hapones. Nagtikang ha boksing hi Casimero didto ha Ormoc ha edad nga dose anyos ngan nagin national amateur champion. Hapagkayana, hiya in na-ukoy na ha Talisay, Cebu pero nauli hiya ha Ormoc kun natatapos an iya mga fights basi igka-urusa han iya mga paryente ngan mga kasangkayan. # (KEVIN SIOSANA)
