Isumat.com/8:25AM, July 18, 2020
Waray kamatuoran an nagsarang nga impormasyon ha social media nga deri daw makakasulod ha Tacloban City an hin-o man nga waray Quick Response Code (QR Code) Pass.
Ini an iginhatag nga kasayuran ni Randy Calahi, an nangungulo han Information Management Office han City Government. Hadin nag-agi nga tulo ka adlaw, may mga nagpasarang ha social media nga deri makakasulod ha syudad an waray QR Code.
Hi Calahi in nagpahayag nga peke in inga impormasyon. Iya ginklaro nga an QR Code in ginagamit ha pagsulod ha mga establisemento, negosyo, tindahan ngan mga opisina ha Tacloban. Kun masulod la ha Tacloban tikang ha iba nga lugar, deri kinahanglan an QR Code Pass.
Pero ginpapahinumdom gihapon nga an tikang ha iba nga lugar in magdara han medical certificate, travel authority ngan valid ID card kun masulod han syudad.
Tinikangan hadin Hulyo 16, igin-implementar na han City Government an paggamit han QR Code ngan gin-aaghat an mga Taclobanon ug mga karuyag bumiyahe ha Tacloban nga mayda toyo ha mga opisina ngan manmamalit, nga kumuha han QR Code ha internet.
An mga Taclobanon in puede kumuha hini ha ira mga barangay officials.
Ini nga proseso in gagamiton ingkaso may contact tracing han posible natapnan han COVID-19.
Naglalaum an LGU-Tacloban nga antis matapos an Hulyo, igpapasunod na ini nga proseso ha ngatanan nga establisemento han syudad.
Amo ini nga website an susudlan ha internet para han karuyag magparehistro : www.safecity.tacloban.gov.ph. #
