Isumat.com/8:50AM, July 17, 2020
Ha syahan nga higayon denhi ha Region 8, mayda burod nga nagpositibo han COVID-19. Ini nga babaye in lakip dida han 11 nga bag-o nga natapnan han kagaw nga iginreport kakulop (Hulyo 16) han DOH Regional Office.
An nasabi nga pasyente in taga Mahaplag, Leyte . Hiya in umabot ha Mahaplag tikang ha Manila hadton Hunyo 27. Sumala han impormasyon tikang han LGU, nakatalaan maghinglaw an 37-anyos nga babaye yana nga bulan.
Ha kasaysayan han COVID-19, mayda na pira nga kaso ha iba nga nasud nga natapnan an iginbuburod han nanay. Mayda mga kaso nga nakatalwas an iroy ug an anak, mayda liwat insidente nga namatay an igin-anak.
Nakagrehistro naman han ira syahan nga kaso han virus an isla nga bungto han Capul ha Northern Samar. An nagpositibo in 52-anyos nga babaye tikang ha Marikina nga umabot hadton Hunyo 26. Tungod kay gin-iinubo ngan usahay naabat hin panluya han kaluluthan, gin-admit hiya ha Northern Samar Provincial Hospital ha Catarman.
Ha Baybay City, tulo an bag-o nga kaso ug hira in mga Locally Stranded Individuals tikang ha Mandaluyong ngan Quezon City ug tanan hira kalalakin-an. Waray iginpapakita nga sintomas ngan tikang han pag-abot deretso hira ha Quarantine Facility han LGU.
Duha naman nga pasyente an nahidugang ha Allen, Northern Samar ngan hira in mga kalalakin-an tikang ha Quezon City nga nagbiyahe pinaagi hin pribado nga behikulo. Maupay an panlawas han duha nga pasyente ngan aadto ha Isolation Unit han LGU. Ha bug-os nga probinsya han Northern Samar, 25 na an natapnan ngan 18 an naka-recover. Pito naman an active cases hapagkayana.
Samtang, katapos hin pira ka adlaw nga nagmiringaw an kagaw ha Tarangnan, bumutho na liwat in bag-o nga kaso pinaagi hin lalaki nga LSI tikang ha Malabon City. Usa gihapon nga babaye nga LSI tikang ha Binangonan, Rizal an bag-o nga kaso ha Motiong. An Catbalogan City in may bag-o nga pasyente ngan hiya in 64 anyos nga babaye.
Ha Pintuyan, Southern Leyte, 17-anyos nga estudyante tikang ha Manila an bag-o nga nagpositibo nga residente han bungto.
Ha bug-os nga Eastern Visayas, 667 na an nagkatatapnan ug an nakatalwas in 622 nga pasyente (93.25%). #
