Isumat.com/7:27AM, October 5, 2020
Ha atubangan han waray hunong nga pagpahinumdom han mga otoridad ha publiko nga likyan la anay an mga katitirok tungod han Covid-19 Pandemic, mayda la gihapon mga mulopyo nga deri napasaway sanglit padayon an paglarab han kagaw.
Birthday Party an gintotoohan nga rason han bag-o nga mga kaso han ginkakahadlukan nga virus ha Tolosa, Leyte. Sumala han impormasyon, usa nga mulopyo han bungto nga nagtatrabaho ha hospital in nagtambong hin pagsa-urog han kaadlawan han iya sangkay. Ini nga Health Care Worker in deri pa maaram nga positibo hiya han virus hadto nga takna.
Paghagos hin pira ka adlaw, nagpositibo hiya, ngan kakulop, iginreport han DOH nga an Tolosa in may bag-o nga lima nga kaso. Tulo hini amo an iginka-urusa hini nga Health Personnel dida han katitirok.
Nagpapadayon naman an contact tracing ha mga barangay han Malbog, Quilao ngan San Vicente ha Tolosa han iba pa nga iginkahibalag han mga nagkatatapnan.
Kun aton manunumduman, gintutudlok nga rason han pagsarang han virus ha Sta Rosa, Barugo, Leyte an pagkatitirok dida hin “Tapos.”
Ha luyo nga bahin, gintugutan na nga makagawas ha Ormoc District Hospital an ira mga personales nga nagnegatibo an swab test. Hadin Mierkules, an hospital an igin-lockdown tungod kay nagpositibo an tulo nga nurses.
Dida han kamanduan han Ormoc City Health Office, an mga personales han hospital nga negatibo an resulta han swab test in puede na makagawas tikang han hospital.
Samtang, nagtitikahirani na ha 5 Mil an mga nagkatatapnan han kagaw ha Eastern Visayas. Nadugangan ini hin 46 nga pasyente kakulop, sanglit aada na ha 4,930 an nagpositibo. An nagpapaka-recover in umabot na ha 4,200 (85%). 46 naman an namatay nga Covid Patients ngan 684 an Active Cases yana. #
