Isumat.com/7:32AM, Enero 11, 2021
Waray bagyo, pero an grabe nga pagbubunok ngan maraot nga panahon tikang han Sabado ngan nagpapadayon tobtob yana an nagin rason hin kaawat hin kinabuhi, pagpanpan han tuna ngan paglunop han baha ha magkalainlain nga parte han Sinirangan Bisayas.
Dida han Sabado, usa nga pumpboat an nalunod ha kalalawdan han Oras, Eastern Samar ngan nalumos an 4-anyos nga lalakihay nga usa han mga pasaheros. An sarakyan in tikang ha Dolores ngan tiuli na unta ha San Policarpo han pagdagmalan hin makusog nga hangin ngan dagko nga mga balud hinungdan han katiklob hini.
Natabagan hin parupangisda an mga pasahero kun diin tulo ha ira an nasalbar, pero an 4-anyos nga biktima in nalumos. An mga na-rescue in gindara ha Rural Health Unit ha San Policarpo.
Nag-antos naman hin mga baha an mga parte han bungto han Oras, Arteche, Jipapad, Maslog, Can-avid, San Julian, Borongan ngan Lawaan ha Eastern Samar.
Nagdesisyon naman an DPWH-Eastern Samar nga igpasara ha trapiko an Taft-Buray National Highway tungod han kadelikaduhan han landslides.
Pira gihapon nga mga bungto ha Northern Samar sugad han Allen, Catarman, Palapag, San Roque ngan Pambujan an ginbabaha.
Samtang, usa naman nga parupangisda an nakatalwas ha peligro han ma-rescue hiya han mga residente ha Maripipi, Biliran. Hi Rogelio Villagas in nangingisda han pagdad-on han hangin ngan balud an iya sarakyan ngadto ha Mariipipi.
Mayda liwat natabo nga pagparik han tuna ha natio nal highway ha Silago, Southern Leyte sanglit waray liwat makaagi an mga motorista.
An NDRRMC in nagpagawas hin advisory nga magpapadayon pa an makusog nga uuran ha kadam-an nga parte han Eastern Visayas yana nga adlaw, Enero 11 ngan posible ha maabot pa nga pira ka adlaw. #
