Isumat.com/7:46AM, Marso 2, 2021
Ha masunod nga duha ka semana matutudlok na an bag-o nga magkakapot han gihahata-asi nga pwesto han Leyte Normal University (LNU) kay hapagkayana aada na ha proseso han pagpili an komitiba ug an grupo nga may poder paghatag hin desisyon.
Dida han nahikay nga impormasyon han Isumat.com, lima nga mga kandidato an malinangpuson nga nakapasar han syahan nga pagtirutimbang han mga kwalipikasyon ngan dokumento para han nasabi nga posisyon ngan tikang han lima, mapipili an bag-o nga LNU President.
Ginlalauman nga antis an Pebrero 19, 2021 mayda na bag-o nga pangulo an prestihoyoso nga unibersidad. Dida hito nga petsa amo an katapos han termino ni Dr. Jude Duarte komo presidente han eskwelahan. An ginpipili yana amo an maliwan kan Duarte nga nagkapot han posisyon hin walo ka tuig.
Yana nga semana, an mga kandidato in makikita ngan mababati-an an ira mga tinguha ngan plano para han unibersidad pinaagi han Public Presentation. Ini in pinaagi han live streaming ha facebook account han unibersidad.
Kataliwan hini, magkakaada hira hin personal nga pakig-atbang ha LNU Presidency Search Committee. Ini nga komitiba an magdudumara han assesment ngan ranking han lima nga tig-sering ngan ira ini igsusubmiter ngadto ha Board of Regents(BOR).
An BOR nga ginkokomponer hin 11-katawo an magboborotosay ug kun hin-o an makaka-angkon han gidadamu-i nga botos ha lima nga kandidato, hiya na an bag-o nga Presidente han LNU.
An lima nga naghihingyap han pwesto amo an masunod:
DR NESTOR SEDANZA – nagkapot hin magkalainlain nga pwesto ha LNU lakip na an pagigin Dean han College of Management and Entrepreneurship, VP-Research and Extension, ngan Director han Physical Plant and Facilities sugad man han ETEEAP/Insitutional Sustainablity Assesment. Hiya in mayda Doctorate in Management ngan Master of Arts in Teaching.
DR. CLEMELLE MONTALLANA – nagin Director han San Isidro, Leyte-LNU Campus, VP-Administration and Finance, Director han Physical Plants and Facilities ngan nakagtapos hin Natural Science ha LNU, sugad man Doctor in Human Resource Management ngan Public Management. Hiya gihapon an pirmi iginkaka-iristorya han mga empleyado ngan pati mga estudyante ha campus nga pirmi naghahatag hin atensyon han ira mga iginpapabati nga isyu.
DR. REYNALDO GARNACE – nagin Director han Phil Science High School (EV), nagkapot hin hitaas nga posisyon ha magkalainlain nga pribado nga eskwelahan, ngan yana Chief Administrative Officer han LNU. Hiya in Doctor of Arts in Language Teaching, Master of Arts in Special Education, Master of Arts in General Education ngan iba pa nga pagpa-uswag hin kina-adman.
DR. EVELYN AGUIRRE – hapagkayana hiya an VP-Admin and Finance han LNU. An iba nga posisyon nga iya ginkaptan hadto amo an VP-Academic Services, Research and Extension, Director han Management Information System, Head of Mass Communication ngan University Board Secretary. Hiya in Doctor of Arts in Language Teaching ngan Master of Science in Devt Communication.
DR. MYRNA MACALINAO – hiya yana an VP-Academic Services han LNU, ngan hadto nagin VP-Student Development Services, Dean of Graduate School, Project Director- DOST Science Education Institute-LNU. Hiya in Doctor of Philosophy in Applied Linguistics ngan Master of Arts in Teaching-Language Teaching.
An mapipili nga bag-o nga LNU President in magseserbe hin upat ka tuig ngan puede hiya tagan hin extension han BOR para hin kadugangan nga upat ka tuig.
Yana nga 2021, an LNU an nagtitigaman han ira ika-100 nga anibersaryo ug an bag-o nga pangulo an magigin piloto han unibersidad ha pagpalangbo ngan pagpa-uswag han hitaas nga kalidad hin edukasyon para han mga estudyante. #
