Isumat.com/8:38AM,May 18, 2020
Pinusil ngan namatay in usa nga babaye nga may problema ha panhuna-huna hadin nakalabay nga adlaw ha Javier, Leyte.
Ginkilala an biktima ngahi Rocel Lucero, 41 anyos ngan taga Barangay Malaguicay, Abuyog, Leyte. Waray naman kakilal-i an suspetsado nga nagpatay ha iya.
Dida han panguna nga imbestigasyon han mga otoridad, hi Lucero in nagliliningkuron la ha may tanod outpost ha Brgy. Picas, Javier, Leyte han tigda la may umagi nga sports utility vehicle ngan ginpusil an biktima hin upat ka beses.
Umiskapo dayon an suspetsado katapos niya pusilon hi Lucero. An biktima in gindara ha hospital pero igindeklarar nga dead on arrival han attending physician.
An mga kapulisan in nakakuha hin upat nga basiyo hin bala hin waray pa katutudlok nga kalibre hin pusil dida han lugar han insidente ngan padayon pa gihapon an imbestigasyon hini nga panhitabo. # (KEVIN SIOSANA)
