Isumat.com/7:40AM, May 17, 2020
Nagtikang na pagka-abot ha Northern Samar an relief goods tikang ha National Government para han mga residente nga apektado ni bagyo Ambo.
Sumala han report han Provincial Information Office, umabot kakulop ha Catarman Airport an C-130 plane han Air Force kun diin luran an sobra usa ka yukot nga family food packs tikang ha DSWD-Cebu. An kada food pack in naglalakip hin unom ka kilo nga bugas, walo nga canned goods, ngan unom ka sachets hin kape nga puede makunsumo hin usa ka pamilya ha sulod hin duha ka adlaw.
Nagpahayag an DSWD-Northern Samar nga Singko Mil nga food packs an igin-alotaga para ha Northern Samar ngan ginlalauman nga mabalik yana nga adlaw ha Catarman an eroplano nga magdadara na liwat han hinabang.
Maabot hin 125 Mil nga pamilya han lalawigan an apektado han bagyo kun diin sobra 5 Mil ha ira in aadto yana ha mga evacuation centers. Sobra 10 Mil nga kabablayan an partially-damaged samtang naabot naman hin 2500 an mga balay nga totally-damaged.
Labot la hini nga ayuda tikang ha DSWD-Cebu, an Provincial Government han Northern Samar in nakagdistribuer na hin Dos Mil nga food packs ha mga bungto han Allen, Victoria ngan Lavezares.
Nagdesisyon naman an Catarman, Mondragon, Pambujan, Laoang ngan Palapag nga an mga relief goods nga para unta ha ira in ighatag nala ha Catubig nga grabe an distroso han bagyo.# (KEVIN SIOSANA)
