Isumat.com/Hunyo 14, 2023
Ha paningkamot nga mabungkag na an pwersa han kumunista nga mga rebelde ha Sinirangan Bisayas, an 802nd Infantry Brigade han Philippine Army in bumalhin tikang ha Ormoc City ngadto ha Borongan City, Eastern Samar.
Hi Brig General Noel Vestuir, Commander han nasabi nga Army Brigade, an nagpahayag nga tinguha hini nga ira gi-os nga matapos na an insurhensiya ha bug-os nga isla han Samar yana nga tuig.
Ha notisya han Philippine News Agency, tungod hini nga pagbalhin han mao nga grupo han kasundaluhan, an tulo nga Army Brigade nga ha ilarum han 8th Infantry Division in nakadestino na yana ha Samar Island.
Aadto ha Hinabangan, Samar an 801st Brigade, samtang an 803rd in nakabase naman ha Catarman, Northern Samar.
An tulo nga brigada in may tagsatagsa nga mga lugar ha bug-os nga Samar Island nga masasakop han ira hurisdiksyon.
Ha deri pala maiha, iginsumat han Armed Forces of the Philippines nga dida han upat nga NPA guerilla front ha Samar, duha nala an nasasalin katapos la mabungkad an duha. An nasasalin nga duha an ginpupuntirya han militar nga mawara na antis an matapos ini nga tuig.
An nasasalin nga duha nga guerilla fronts in nagi-os ha Northern Samar ngan pira nga parte han mga probinsya han Samar ngan Eastern Samar.
Iginpatapod naman han Philippine Army nga deri nira ginbabayaan an Leyte, Biliran ngan Southern Leyte bisan kun bumalhin ha Eastern Samar an 802nd Brigade. Ini in tungod kay may mga Army Battalions nga nakadestino ha Kananga ngan Mahaplag, Leyte basi manginano han kamurayawan han nasabi nga mga lugar.
An 802nd Brigade in sobra 20 anyos nga nakabase ha Camp Downes, Ormoc City antis an ira pagbalhin ngadto ha Borongan City. #
