Isumat.com/Hulyo 18, 2023
Gintotoohan nga an deri pagka-asya ha mga regulasyon ha gallera an hinungdan han insidente hin pamusil ha Merida, Leyte hadton Hulyo 16, 2023.
Ginkilala an biktima nga hi Jobert Quinones, inasaw-an, waray trabaho, ngan residente han Brgy Lamanoc han mao nga bungto; samtang an gintatahapan amo hi Christopher Urbano, 36 anyos, inasaw-an, waray trabaho, ngan taga Brgy Poblacion.
Ha inisyal nga imbestigasyon han Merida PNP, pasado alas 4 han kulop natabo an pamusil kun diin an biktima in nag-antos hin igo hin bala ngan gindara ha usa nga hospital ha Ormoc City basi pagtambalon.
Antis hini, an biktima ngan suspetsado in nagkaada hin mapaso nga argumento mahitungod han regulasyon han bulangan. Katapos hadto nga argumento, an suspek in nagbayad hin kantidad ngadto han nagdudumara han gallera.
Kasering han mga nakakita nga waray na problema, pero han pagkagawas ha bulangan, nag-debate na liwat hira Quinoines ngan Urbano. Dida hini, ginsuntok ni Quinones hi Urbano. Nahawiran han mga testigos an duha nga deri na magsumbagay ngan nagbulag hira kay umuli na an suspek.
Ngay-an kay kumuha hin pusil an suspetsado ngan bumalik ha bulangan ngan pinusil hi Quinones han iya dara nga armas nga waray pa hisabuti an kalibre.
Gindara ha hospital an biktima samtang kumalagiw an suspetsado ngan waray pa kadadakop tobtob han ginsusurat ini nga balita. #
