Isumat.com/Hulyo 18, 2023
Padayon nga nagtitikahilaba an listahan han mga tawo nga biktima hin panmatay ha Calbayog City.
Dida han Hulyo 15 ngan Hulyo 16, 2023, duha nga kalalakin-an an binawi-an hin kinabuhi han pagpusilon hin waray panhikilal-i nga mga suspetsado ha magkalain nga insidente.
An syahan nga biktima in ginkilala nga hi John Joseph Rebucas, nga taga Sta Margarita, Samar.
Natabo an insidente pasado alas 4 han maagahon ha Magsaysay Blvd Extension ha nasabi nga syudad.
An ikaduha nga biktima in ginkilala nga hi Mael Roxas, 37 anyos, drayber hin traysikol, ngan residente han Purok 5, Brgy Bagacay.
Ha report han PNP, pasado alas 12 han udto, Hulyo 16, hi Roxas in napahuway ha ira balay han tawagan hiya ha cellphone ngan gumawas hiya ha ira balay.
Paghagos hin pira ka minutos, an iya iroy nga hi Alma in nakabati hin mga buto hin pusil ngan waray pag-iha ginsumatan hiya han ira amyaw nga pinusil an iya anak.
Hinsabutan ha imbestigasyon nga samtang an biktima in nakikig-istorya ha telepono gawas han ira balay, tigda la nga may umabot nga motorsiklo sakay in duha ka tawo. An naka-angkas an nagpusil kan Roxas hin pira ka beses.
Nakit-an gihapon ha CCTV nga may kaupod pa an duha nga suspetsado nga nakaposisyon ha luyo hin usa nga truck nga amo an nagserbe nga spotter . An tulo nga suspetsado in umiskapo katapos han krimen.
Hi Roxas in namatay ha lugar han krimen tungod han mga igo hin bala ha magkalainlain nga parte han iya lawas. #
