Carigara Leyte – Ano na an nahitabo han imbestigasyon han guin aalegar nga mga ghost projects ha Carigara han panahon ni anay Mayor ngan yana Leyte board member Anlie Apostol?
Ini amo an unod han Sangguniang Bayan Resolution han konseho han Carigara Leyte nga naka address ha Sangguniang Panlalawigan Han Leyte ngan ha opisina han Ombudsman.
Ini kahuman maglabay in sobra upat ka bulan tikang ipadara an mga dokumento ha mao nga mga ahensiya han gobyerno may kalabutan han 6 milyones ka pesos nga kantidad han guin aalegar nga ghost projects hin mga impounding water facilities ha tulo nga mga barangay ha Carigara nga amo an barangay Binibihan, San Isidro ngan Paglaum han panahon nga Mayor han bungto hi Anlie Apostol samtang nga kogresista naman an iya nanay nga hi Ebbie Apostol.
Sumala kan konsehal Dennis Garay usa han mga nag imbestigar han mao nga alegasyon nga waray nira iba nga panuyo kundi mahibaruan la an status han mao nga issue mahitungod nga waray man hira may nakarawat nga update tikang ha sangguniang panlalawigan ngan ha ombudsman.
Hi konsehal Garay in usa anay nga ka alyado ha politika han mga Apostol ngan yana aada na ha grupo ni Mayor Boy Ong han mao nga bungto.
Dida han 6 milyones nga pundo, 5 million in tikang ha Bureau of Soils and Water Management ngan an 1 million tikang PDAF han iya nanay Rep. Trinidad Apostol.
Hi board member Anlie Apostol in waray pa maghatag hin anuman nga komento tikang gumawas an mao nga issue.
An committee report han Sangguniang Bayan han Carigara parti han guin aalegar nga mga ghost projects in guin refer ha Blue Ribbon Committe nga iton chairman han mao ng committe in hi Leyte 2nd District Board Member Nico Villasin.
Waray pa may guin hatag nga official statement hi Board Member Villasin kon ano na an status han mao nga issue.
Pamatii an interview kan konsehal Dennis Garay han Carigara, Leyte.
