Isumat.com/Hunyo 6, 2023
Naghimo na hin pitad an An Waray party-list basi baligtaron an desisyon han Comelec 2nd Division nga pagkanselar han rehistrasyon han partido.
Kanina han aga, Hunyo 6, 2023, an An Waray party-list in nagsampa hin motion for reconsideration basi utro timbangon an desisyon nga kanselaron an rehistrasyon kay nakatalapas an grupo ha balaud han party-list.
Kun manunumduman, an Comelec 2nd Division in nagmando nga kanselaron an rehistrasyon han party-list group kay ginpalingkod han grupo an 2nd nominee nga hi Atty Victoria Isabel Noel komo miembro han kongreso hadton 2016 bisan waray iginpagawas nga Certificate of Proclamation para han nominado.
Kasumpay hini, dida han ira mosyon, igindig-on han An Waray nga ha balaud han party-list, an kandidato amo an grupo ug an iginpoproklamar amo mismo an grupo ngan deri an nominado. Sanglit, deri na kinahanglan pa an proklamasyon han nominado kay nahaproklamar man nga nagdaog an grupo.
Gintudlok han grupo an bag=o nga kamanduan han Comelec kun diin ira gintugutan makalingkod hi Erwin Tulfo komo representante han ACT-CIS kun diin nagsering an Comelec nga deri na kinahanglan igproklamar hi Tulfo kay nahaproklamar naman an party-list.
Igindig-on pa han An Waray nga an Comelec in waray hurisdiksyon han legalidad han proklamasyon ni Noel kay an may otoridad hini nga isyu amo an House of Representatives Electoral Tribunal (HRET) nga amo an magdedesisyon ha mga isyu han election, mga botos ngan kwalipikasyon han mga miembro han kongreso. #
