Tinikangan dida hiton Lunes, Marso 16, 2020 magpapatuman hin magkalain-lain nga mga pitad kontra han COVID-19 an mga Local Government Units ha Rehiyon Otso, ug ini in naglalakip han 4-day work week, checkpoints ngan pagsara han operasyon han mga tourist spots.
Ha Tacloban City, labot la han gindeklarar nga class suspension ha ngatanan nga eskwelahan, nagpagawas gihapon hin kamanduan hi Mayor Alfred Romualdez nga 4-day work week schedule para han mga magtatrabaho nga nasasakop han City Government. Subay han executive order, tikang la ha Lunes tobtob Huebes an trabaho pero magtitikang an office hours alas 7 han aga tobtob alas 6 han gab-i.
Ginklaro naman ni Romualdez nga an opisina han City Mayor, TOMECO, City Health Office, CSWDO, Tacloban City Hospital ngan iba pa nga departamento nga naghahatag han basic ngan emergency services in deri lakip hini nga 4-day work week.
Ha syudad han Ormoc, amo gihapon ini an oras han trabaho han mga empleyado han LGU, pero iba an istilo han ira schedule. Tikang Lunes tobtob Domingo an operasyon han City Hall. An kada departamento in maghihimo han ira kalugaringon nga schedule nga upat la ka adlaw ka semana pero kinahanglan makumpleto an 40 ka oras nga trabaho kada semana. Bootsidngon, kada adlaw may mga trabahador, pero iba-iba na an schedule nira han pagtrabaho.
Maglulunsad gihapon an LGU-Ormoc hin mga checkpoints ha ngatanan nga entry points han syudad. An ngatanan nga masulod han syudad pinaagi han land transportation o barko in mag susurat hin dokumento kun diin ira igsusumat an ira pangilal-an basi magin masayon an contact tracing pananglitan may mag positibo han COVID-19 .
In inga checkpoint procedure ha Ormoc an gin-implementar na gihapon ha Naval, Biliran kun diin tanan han pasaheros han public utility vehicles nga masulod ha Naval an kinahanglan mag fill-out gihapon hini nga papeles. Labot la hini, magdudumara gihapon an Naval-LGU hin floushing ha ira merkado publiko kada duha ka adlaw basi maseguro nga limpyo ini.
Ha probinsya naman han Samar, iginmando ni Gobernador Michael Reynold Tan an temporaryo nga pagsuspender han operasyon han mga tourist destination han lalawigan. Upod hini nga mga lugar hin turismo amo an Lobo Cave, Lulugayan Falls, Langun Gobingob Cave, Balantak Falls, Sohoton Cave ngan Saob Cave. #
