Isumat.com/Agosto 9, 2023
Nagka-aawat an kinabuhi hin tulo ka tawo han an ira traysikol nga sinasakyan in nabunggo hin Sports Utility Vehicle (SUV) samtang nagbibiyahe hira ha national highway, Brgy 6, San Julian, E. Samar, kakulop, Agosto 8, 2023.
Ha report nga nakadangat ha PNP Regional Office, ginkilala an mga namatay nga hira Brenda Colico, 60 anyos; Ariel Colico, 56 anyos; ngan hi Joan Fe Colico. 47 anyos. Hira in mga residente han Brgy Nena han mao nga bungto.
Nag-antos naman hin karamtan ha lawas an nagmamaneho han traysikol nga hi Glezy Mae Yohanon, 21 anyos nga nag-uukoy gihapon han nasabi nga barangay.
Ginkilala an drayber han SUV nga hi Sammy Shane Cainto, 39 anyos, ngan residente han Brgy Sta Fe, Borongan City, E. Samar.
An nadadabi nga mga behikulo in usa nga Toyota Innova nga kolor gray ngan may plate number LHM 550; ug an TMX Tricycle nga may plaka HZ 1519.
Ha imbestigasyon han kapulisan, pasado alas 11 han aga han matabo an aksidente ha nasabi nga lugar.
An duha nga behikulo in nagsusulsog ha magkalain nga dereksyon. Pag-abot ha lugar han insidente, nawarayan kontrol ha manibela hi Cainto ngan kumabat an iya SUV nga ginmamaneho-an ha kaluyo nga lane han kalsada ngan nabanggaan an iginkakatapo nga traysikol.
Kadagmitan gindara ha Eastern Samar Provincial Hospital an mga sakay han traysikol pero an tulo ha ira in binawi-an hin kinabuhi tungod han grabe nga injuries nga ira gin-antos.
An drayber han SUV in aada ha kustudiya han San Julian PNP Station ug nagpapadayon pa an kapulisan han imbestigasyon.#
