Isumat.com/Agosto 9, 2023
Desidido an mga menor-de-edad nga biktima ug an ira tagsatagsa nga pamilya nga pasakaan hin kaso an nagpapaluyo han pagkuha ngan pagpasarang han video ngan panlugos han mga biktima nga natabo ha Dolores, E. Samar.
Ha pahayag han Dolores Municipal PNP Station, mga kaso hin panlugos ngan pakatalapas han Republika Acta 9995 o pag-upload hin sensitibo nga video nga waray katugutan an aatubangon han mga suspetsado.
Kun manunumduman, pira na ka adlaw an nakalabay han magsarang ini nga video kun diin makikit-an an mga menor-de-edad nga kababayen-an nga naka-uniporme pa hin kanan eskwelahan nga ginmomolestya ngan ginpalamadya-an an ira pagkababaye han pira nga suspetsado nga kalalakin-an.
Hinsabutan ha imbestigasyon nga han Marso pa natabo an insidente pero han Domingo, Agosto 6, 2023 la gumawas ngan nagsarang an nasabi nga video nga nagin sentro hin iru-istorya han mga katawhan.
Iginsumat han kapulisan nga hadto nga takna, an duha nga biktima in ginkumbida hin babaye nga ira sangkay nga makadto daw hira hin birthday party.
Pero imbes nga party an ira dadangatan nga lugar, mga irimnon la nga makahurubog an nakit-an didto ngan mayda mga kalalakin-an.
Kataliwan hini, nag-irignom an grupo ngan dida han pagkahuhubog han mga biktima, ginpalamadyaan na hira ngan ginkuhaan pa hin video.
Igindugang pa han mga imbestigador nga lima tobtob hin pito nga mga suspetsado an natudlok han mga biktima, ngan nakilal-an gihapon an nag upload han video.
Hinsabutan gihapon nga waray na kikitaa ha Dolores an babaye nga nag-imbitar han mga biktima, pero nagsering an kapulisan nga iglalakip nira ha kaso an mao nga babaye.
