Isumat.com/Hulyo 25, 2023
Tungod han mabinungahon nga mga inisyatibo para han kaupayan han mga senior citizens, ginkilala ngan natudlok an LGU-Borongan City nga usa han walo nga mga komunidad ha Pilipinas nga modelo para han implementasyon han nasabi nga mga programa.
Dida han katatapos pala nga National Convention and Orientation of Age-Friendly Cities and Communities (AFCC) ha Mandaue City, usa an Borongan City ha mga lugar nga gindayaw hin prestihiyoso nga mga organisasyon tungod han pagpatuman hin mga proyekto ngan programa han LGU nga pirmi iginlalakip an kabutangan han senior citizens.
Mismo an World Health Organization (WHO) ngan National Commission on Senior Citizens (NCSC) an nag-rekognisar han paningkamot han LGU nga maka-agom hin kadam-an nga mga benefecio an asasakoip nga mga senior citizens.
Dida han nasabi nga katitirok, iginpresentar han LGU-Borongan City an mga serbisyo nga iginpapadangat ha mga senior citizens sugad han Monthly Monetary Allowance, Dukwag Agrikultura, Libre Medisina ngan iba pa nga dako an tambulig ha mga edaran na nga Boronganon.
An mga modelo nga LGU ha pagpahi-agom han mao nga mga benefecio amo an Borongan City, Eastern Samar; Probinsya han Camarines Norte; Culion, Palawan; Maguindanao del Sur; Island Garden City, Samal; Paranaque City; Sabtang, Batanes; ngan Sta Catalina, Ilocos Sur.
Hi NCSC Chairman Franklin Quijano in naghatag hin du-on ha iya pamulong nga kinahanglan ig-upod an mga senior citizens ha ngatanan nga programa han mga LGU.
Dida hiton Agosto 8-9, 2023, mabisita ha Borongan City an mga tinaglawas han WHO ngan NCSC basi personal nga masaksihan ngan magdumara hin pamaki-ana ha mga opisyales han syudad kasumpay han mga proyekto nga nahipa-angbit durante han National Convention.
An LGU-Borongan City in ginrepresentaran nira CSWDO Head Verina Amoyo, Engr Fatima Catudio ngan Special Operations Officer Cynthia Arceno dida han mao nga hiruhimangraw ha Mandaue City, kun diin an mga partisipante in nagka-urusa pagpirma hin kasabutan basi igpadayon ngan pakusgon pa an tagsatagsa nga programa para han mga senior citizens. #
