Isumat.com/Hulyo 24, 2023
Naawat an kinabuhi hin duha nga kaapi han New Peoples’ Army ngan nakuha han militar in kadam-an nga armas han kumunista nga grupo ha magkabulag nga asdangay ha Northern Samar ngan Samar hadin nag-agi nga adlaw.
Ha report nga nahikay han IsumatNews, nagkasurapo an kasundalohan han 19th Infantry Battalion ngan rebelde nga NPA pasado alas 12 han udto, Hulyo 22, 2023 ha Brgy Cagbigaho, Pambujan, N. Samar. Dida hini nga insidente, namatay an duha nga mga rebelde ginkilala nga hira Jerry Lutao alias Nadi han Sub-Regional Committee Emporium ngan Brando Obiado nga nangungulo han Squad 2, Sub-Regional Committee Emporium han CPP-NPA Eastern Visayas.
Nakuha gihapon han militar an duha nga M161A rifles, usa nga M14, personal nga mga gamit ngan subersibo nga mga dukumento. Usa nga sundalo an nahireport nga nag-antos hin kasamdan ngan gindara ha hospital basi pagtambalon.
Samtang, nahitabo liwat an engwekntro ha butnga han militar ngan mga rebelde ha Brgy Bangon, Catbalogan City hadton aga han Hulyo 21, 2023.
Nagpahayag an 8th Infantry Division han Philippine nga nakakarawat hira hin sumbong nga may armado nga grupo didto han nasabi nga lugar ngan kadagmitan ginkadto ini han kasundaluhan.
Didto na nira iginkahibalag an nasabi nga grupo nga gintotoohan mga rebelde nga kumunista.
Katapos hin pira ka minutos nga pupsilay, nangalagiw an mga rebelde ngan nakuha han militar an ginbayaan nga mga armas han mga kumunista.
Ini in ginlalakipan hin tulo nga M16 rifles, usa nga granada, kadam-an nga bala hin magkalainlain nga kalibre hin pusil ngan teleskopyo.
Waray nahireport nga casualty ha panig han militar dida hini nga insidente ha Catbalogan City. #
