Isumat.com/Hulyo 20, 2023
Padayon nga nag-aantos hin kaperdihan ngan pagtikaluya an mga rebelde nga NPA ha aton dapit han madiskubre ngan marekupo han militar in kadam-an nga mga armas de fuego ngan mga gamit pan-gyera han walhon nga grupo ha Brgy Buco, Can-avid, E. Samar hadin nag-agi nga adlaw.
Ha report han 8th Infantry Division han Philippine Army, naukab han militar an iginlubong nga mga armas nga ginlalakipan hin lima nga M14 rifles, upat nga M16 rifles, usa nga shotgun, usa nga M79 grenade launcher, an igindederi nga anti-personnel land mine, ngan iba pa nga higamit.
Naghimo hin operasyon an mga tropa han 42nd Infantry Battalion ha pamuno ni Lt Col Rodito Gotladera nga makuha an mao nga mga armas katapos la nga igtutdo hin anay rebelde nga sumurender an lugar kun diin ginlubong an mao nga mga armas.
Kasumpay hini, hi Gotladera in nagpahayag nga papahugton pa han militar an ira operasyon basi magkadadakop an nasasalin nga mga rebelde ngan makuha an ginhihipos nira nga mga armas basi kabalabgan an magraot nga plano kontra ha mga sibilyan ngan militar.
Ini nga malinangpuson nga operasyon han nasabi nga batalyon in gindayaw ni Maj General Camilo Ligayo, an Commander han 8th Infantry Division. Sering ni Ligayo, dako ini nga pitad ha paningkamot nga mahunong na an pira ka dekada nga insurhensya labi na ha isla han Samar.
Hapagkayana, an ginsesentro han military operations amo an nasasalin nga duha nga guerilla fronts han NPA nga nagpupugad ha Northern Samar.
An militar upod an iba pa nga ahensya han gobyerno in nagpapadayon pagpadangat hin proyekto ngan mga serbisyo ngadto han tay-aw nga mga lugar basi deri na mahibalik didto an impluwensya han mga rebelde nga kumunista.
Padayon liwat an panawagan han militar ha mga rebelde nga bumalik na ha panig han gobyerno ngan mabuhi hin mamurayaw upod an ira tagsatagsa nga pamilya. #
