Isumat.com/Hulyo 13, 2023
Usa na liwat nga taga Ormoc City an natudlok nga magin miembro han Pilipinas Mens’ Basketball Team.
Hi Kurt Nathan Velasquez in kaapi han Gilas Mens’ U16 Team nga makikiglantugi han tiarabot nga SouthEast Asia Basketball Association (SEABA) Championships ha Jakarta, Indonesia dida hiton Hulyo 17-19, 2023.
Hi Velasquez nga nag-oyag ha University Of Sto Tomas Tigers Junior Cubs in nagpa-ilarum hin ensayo upod an bug-os nga team antis hira bumiyahe tikadto ha Jakarta.
An magigin kampeon hini nga torneo in ma-qualify para han Asian U16 Championships ha China hiton Setyembre.
Igkaka-asdangay nira Velasquez ha mao nga kompetisyon an mga teams tikang ha Malaysia, Thailand ngan Indonesia.
An iya igkasi Ormocanon nga hi Robert Bolick in nagin kaapi na hadto han Gilas Seniors National Team.
Hi Bolick in nagpirma hin duha ka tuig nga kontrata ha Japanese B League katapos han iya pagmulay ha Northport ha PBA. #
