Isumat.com/Hunyo 28, 2023
An syudad han Ormoc in tinatawag nga “City of Beautiful People” ngan gintutudlok gihapon nga “Events Capital of Eastern Visayas.”
Pero deri mahunong an liderato han syudad ha paningkamot pagpa-uswag han panginabuhi, turismo, edukasyon ngan iba pa nga sektor ngan industriya. Sanglit, dida han sunod-sunod nga mga okasyon ngan aktibidad ha pagtigaman han kapatronan nira San Pablo ngan San Pedro, permanente gud nga iginpapasamwak nira Leyte 4th District Rep. Richard Gomez ngan City Mayor Lucy Torres Gomez an ira tinguha para han mga Ormocanon nga “The best is yet to come.”
![](https://isumat.com/wp-content/uploads/2023/06/ormoc-lucy.jpg)
Ha mga pamulong han mag-asawa nga Gomez, ira ginhihingyap an pagpa-uswag han edukasyon, ngan sentro hini amo an pag-abri han Ormoc City College yana nga masulod nga school year kun diin pagdudumaraon ini han LGU ngan kadam-an nga mga Ormocanon nga estudyante an makakapahimulos han waray bayad nga pag-eskwela.
Gintatagan gihapon hin prayoridad han LGU an pagpadukwag han sports kun diin nagtitikadamo an mga magkarit nga atleta han syudad nga nakakakuha hin mga medalya ha national ngan international tournaments.
![](https://isumat.com/wp-content/uploads/2023/06/ormoc-goma.jpg)
Deri gihapon hikakalimtan an turismo kun diin nagpapadayon an pagpaka-upay han Ormoc City Museum, pagrehablitar han City Plaza, pagtindog hin Board Walk ha baybayon nga naatubang han parke, rehablitasyon ngan pagpahusay han Lake Danao ngan iba pa nga tourist destination han syudad.
Plano gihapon han LGU nga abrihan an Ormoc Pina Festival para han mga contingents tikang ha magkalainlain nga parte han nasud basi mas magin maribhong an nasabi nga kompetisyon.
Ini in pira la han mga ginhihimo ngan plano iglunsad nga mga proyekto ngan programa para han mga Ormocanon.
![](https://isumat.com/wp-content/uploads/2023/06/ormoc-miss.jpg)
Sering pa nira Cong Richard ngan Mayor Lucy, ha kada pagmamata nira hit aga, an ira syahan nga pinanginginano an sitwasyon han ira nasasakupan nga katawhan nga amo an ira inspirasyon nga magpadayon paghatag hin tim-os nga serbisyo publiko.
Kadam-an nga mga aktibidadis an iginpasalida han LGU han pagsaurog han kapistahan yana nga tuig lakip na an Miss Ormoc, Pina Festival Queen, Pina Festival Showdown and Streetdancing, mga konsyerto ngan kadam-an nga kali-awan. #
![](https://isumat.com/wp-content/uploads/2023/06/ormoc-pina.jpg)