Isumat.com/Hunyo 6, 2023
Nagka-aawat an kinabuhi hin usa nga negosyante ngan usa nga drayber hin pedicab ha magkalain nga aksidente ha kalsada ha Ormoc City ngan Palo, Leyte kakulop, Hunyo 5, 2023.
Ha report han Ormoc City PNP, ginkilala an namatay nga hi Ronnie Quisidio, 55 anyos, inasaw-an, negosyante ngan na-ukoy ha Brgy Bagong Buhay han nasabi nga syudad.
Ha imbestigasyon han kapulisan, alas 8 han aga hi Quisidio in nagmamaneho hin motorsiklo ngan nagsusulsog ha dereksyon tikang ha city proper tikadto ha Brgy Ipil. Kadungan niya nga nagbibiyahe ha nasabi nga kalsada an Nissan Urvan van nga ginmamanehoan ni Torben Christiansen, 75 anyos, retirado nga seaman, taga Denmark pero nag-uukoy na yana ha Padre Burgos, Southern Leyte.
Pag-abot ha lugar han insidente ha Brgy Bantigue, an motorsiklo in tigda lumiko tipawala ngan nagkasampakay ini han iya iginkakadungan ha kalsada nga van. Tungod han pwersa han banggaay, natumba an motorsiklo ngan nag-antos hin inuries hi Quisidio.
Igindeklarar nga dead on arrival an biktima han pagdad-on ha hospital, samtang an mga nanhidabi nga behikulo ug hi Christiansen in gindara ha PNP Station para han kaangayan nga disposisyon.
Samtang, han alas 6:30 han aga, binawi-an hin kinabuhi an pedicab driver nga hi Eufemio Ortega han aksidente nga mabunggo an iya pedicab hin Toyota Innova ha West by-pass road, Sitio Caloogan, Brgy San Jose, Palo, Leyte.
An biktima in 55 anyos, ngan taga Brgy Cavite West han Palo, Leyte. An drayber han Innova in ginkilala nga hi Rodney Yamas, 42 anyos, drayber hin pribado nga kompaniya ngan residente han Brgy Apale, Isabel, Leyte.
Ha imbestigasyon han Palo PNP, parehas an dereksyon han pedicab ngan Innova. Nag-insema an Innova ha sarakyan nga na-uuna ha iya, pero nakalasan hiya nga pag-ensima niya, nakadto an pedicab ha usa pa nga lane ngan iya ini nabunggu-an.
Nahilasik hi Ortega ngan nag-antos hin gulpi nga karamtan ha lawas ngan igindeklarar han Palo Rural Health Unit nga dead on arrival.
An drayber han Innova in ginkustudiya han Palo PNP para han kaangayan nga dokumentasyon ngan disposisyon. #
