Isumat.com/Mayo 18, 2023
Haros katunga han suplay han tubig ha Tacloban City in nangangadto la han iligal nga mga koneksyon ngan kinahanglan sampaan na hin kaso an mga indibiduwal nga nagbubuhat hini.
Ini an igindig-on ni Tacloban City Mayor Alfred Romualdez ha iya pakighimangraw ha mga kaapi han media han nag-agi nga adlaw.
Iginbuyagyag ni Romualdez nga maiha na ini nga natatabo denhi ha Tacloban ngan ini in subay han report ha iya han mga engineers tikang mismo ha Prime Water Leyte Metro.
Dako an paghipa-usa han amay han syudad kun kay-ano nga tobtob yana waray pa nakakasuhan ha mga naghihimo hin iligal nga koneksyon han tubig.
Nagtatahap an alkalde nga may poderoso nga mga indibiduwal nga naghahatag hin proteksyon ngadto hini nga mga iligalista sanglit deri napapasakaan hin kaso.
Iginsumat ni Romualdez nga maiha na nga panahon nga mayda na lista kun hira hin-o ngan kun ano nga mga establisemento ha Tacloban City an may iligal nga koneksyon han tubig.
Posible ngani nga may pira nga politiko nga nagpapaluyo hini nga iligal nga mga koneksyonb, pahayag pa ni Romualdez.
Iya naman gintagan hin duon nga waray niya ginpoproteksyunan sanglit kinahanglan deri gud mag-alang an PrimeWater Leyte Metro pagsampa hin kaso. Iginpatapod pa han alkalde nga waray niya keber bisan hin-o pa an masampaan hin kaso.
Gin-ayat ni Romualdez an Prime Water nga pangutdon na ini nga iligal nga mga koneksyon ha kadagmitan nga panahon basi makatagamtam an ngatanan nga Taclobanon hin bastante nga suplay hin tubig.#
