Isumat.com/Mayo 15, 2023
Imbes nga klase ha eskwelahan an aatenderan, nahipaslak ha karsel tungod han paghidabi ha pagbaligya hin iligal nga droga in usa nga maestro han masikop hiya ha anti-illegal drugs operation ha Brgy Poblacion 1, MacArthur, Leyte, Mayo 14, 2023.
Ha report han PDEA-Eastern Visayas, ginkilala an suspek nga hi Ian Aaron Orabe, 41 anyos, Administrative Assistant ha DepEd- MacArthur ngan na-sideline nga maestro ha pribado nga eskwelahan ngan nag-uukoy ha Brgy Poblacion 2 han nasabi nga bungto. Hi Orabe in ginkokonsiderar nga High Value Target han mga otoridad.
Dida han operasyon han kapulisan ngan PDEA-Leyte, nakapalit hin usa ka sachet hin gin-aalegar nga shabu an poseur-buyer. Kataliwan hini, ginkapkapan an suspetsado ngan nakuhaan pa hiya hin kadugangan nga 12 ka sachet hin gintotoohan nga droga.
An gin-aalegar nga shabu in may timbang nga dos gramos ngan balor hin 14 Mil pesos.
Temporaryo nga paslak ha PDEA Detention Facility an gintatahapan samtang gin-aandam an kaangayan nga mga kaso nga igsasalawad kontra ha iya.
Samtang, usa naman nga kapitana hin barangay ha Tacloban City an arestado tungod han paghilambigit han iligal nga on-line sabong dida han Mayo 12, 2023.
An suspetsado in ginkilala nga hi Alice Chua, 60 anyos, inasaw-an, residente ngan Brgy Captain han Brgy 38, La Conga, Tacloban City.
Nadakop gihapon an napusta ha iya nga hi Christopher Busa, 38 anyos nga taga Sabang District han nasabi nga syudad.
Usa nga undercover agent han PNP an nakakumpirmar han iligal nga pagpataya han pumusta hiya dida han pagpasilitar ni kapitana.
An mga suspetsado in maatubang hin mga kaso kasumpay han pagtalapas han balaud kontra han illegal gambling. #
