Isumat.com/ Marso 20, 2023
Nagpapabilin an problema kasumpay hin mga kabataan nga nanhihidabi hin krimen, kay didto ha Borongan City, Eastern Samar, nadakop in upat nga menor-de-edad ha alegasyon nga nangawat hin tindahan hin lechon manok hadin nag-agi nga adlaw.
Ha report han PNP-Regional Office, ginkilala an mga suspetsado nga hira alyas June, 16 anyos; alyas Renan, 13 anyos; alyas Ryan, 15 anyos, ngan alyas Jemar, 14 anyos. Ini nga mga kabataan in tanan nag-uukoy ha Maydolong, sapit nga bungto han Borongan City.
Ha inisyal nga imbestigasyon, natabo an pangawat han maagahon han Marso 18, 2023 kun diin an usa nga litsonan hin manok nga tindahan ha Brgy Songco han mao nga syudad in nasulod han mga suspetsado pinaagi han pagruba han kandado han porta ha luyo han estbalisemento.
Sumala pa han report, nadara han kabataan in 33 Mil pesos nga salapi ngan usa nga Vivo cellphone.
An tag-iya han tindahan in nagreport ha kapulisan han iya madiskubrehan nga nawawara na an kwarta ngan cellphone ha iya tindahan. Kadagmitan nga naghimo hin imbestigasyon an mga otoridad ngan ira nakit-an ha CCTV Footage an ginbuhat han mga suspetsado.
Dida han CCTV, an upat in sakay hin motorsiklo ngan duha ha ira in nagsangkal han pader ngan nakasulod ngadto han tindahan, ngan paghagos hin 10 minutos, gumawas ngan sumakay na liwat han motorsiklo kun diin nagghuhulat an ira mga kaupdanan.
Nakigsumpayan dayon an mga otoridad ha Borongan ngadto ha Maydolong PNP kay tikadto an dereksyon han pag-eskapo han mga suspetsado.
Alas 11 han aga hadto manta nga adlaw, na-aresto han Maydolong PNP an upat nga suspetsado ha Brgy 4 han mao nga bungto, ngan narekupo han kapulisan in 13, 600 pesos ngan vivo cellphone tikang ha ira.
An mga menor-de-edad an gin turn-over han Maydlong PNP ngadto ha Borongan City Police para han kaangayan nga disposisyon. #
