Isumat.com/ Nobyembre 24, 2022
Deri madadayon yana nga tuig 2022 an pagtikang han paghimo han Causeway nga derekta magsusumpay han downtown Tacloban ngadto ha airport han syudad.
Ini an iginsumat ni Engr Noel Nadera, Chief of Planning Section, Planning & Design Division han DPWH Regional Office durante han Media Forum ha Hotel de Fides, Tacloban City, kakulop, Nobyembre 23, 2022.
Sumala kan Nadera, nagkamay-ada hin modification o pagbag-o han plano sanglit nalangan an proseso han proyekto. Gintatarget unta han DPWH nga matikangan an pagtrabaho han causeway antis matapos an 2022.
Hapagkayana, igpapasamwak na han DPWH Central Office an mao nga proyekto para masabutan han mga pribado nga kompaniya nga intresado umapi para han bidding. Ginlalauman nga magkakaada hin bidding yana nga tuig basi matudlok an contractor nga magdudumara han proyekto, sering ni Nadera.
Tungod hini nga kahimtang, hit 2023 pa ma-arangkada an construction han Tacloban causeway, sumala han DPWH official.
Ini nga proyekto in nagkakantidad hin 3.4 Bilyones pesos. An kahilab-on hini in 2.5 kilometros kun diin mayda hini 4-lanes para han mga behikulo, 2.5 meters nga bikelane ha magkaluyo nga daplin, ngan may sidewalk para han mga pedestrian.
Ginlalauman nga makaka-iban ini han kadamo han mga behikulo nga naagi han kalsada tikang ha city proper nga nagsusulsog han Real St tikadto ha airport, labot la nga magigin tourist attraction ini para han publiko.
Ini nga proyekto in titikangan ha may Balyu-an Park Area ngan matalabok ha Cancabato Bay ngadto na ha Tacloban Airport. #
