Isumat.com/Hunyo 3, 2022
Gintotoohan nga an deri pagkasabot nira nga mag-asawa an nakagduso hin usa nga mister ha Tacloban City nga magpakamatay pinaagi hin pagbitay han iya kalugaringon.
Dida han inisyal nga imbestigasyon, ginkilala an biktima nga hi Rommel Ilaysa, 44 anyos, inasaw-an ngan nag-uukoy ha Brgy 88, San Jose District han Tacloban.
Sumala han mga imbestigador, an San Jose PNP Station in nakakarawat hin tawag ha telepono pasado alas 9 han gab-i hadton Hunyo 1, 2022, nagsusumat han insidente hin paghikog.
Kadagmitan nga pumakadto ha balay han biktima an mga otoridad kaupod an Rescue Unit han syudad. Ira nakit-an nga nabitay an lawas han biktima gamit an pisi nga iginhigot ha iya liog ngadto han baybayan han ira balay.
Gintalinguha pa han mga rescuers nga madara ha hospital hi Isayla, pero igindeklarar han doktor nga dead on arrival.
Igin-asoy han misis han biktima nga nag-inaway hira hadto nga adlaw ngan posible nga nagin mabug-at ini nga kahimtang para han iya mister.
Tyempo naman nga lumakat an iya misis hadto nga gab-i ngan pumakadto ha balay han ira anak. Nag-usaan la dida han ira panimalay an biktima ngan dida hini iya ginhimo an iya pag-suicide. #
