Isumat.com/Enero 25, 2022
Na-aresto han mga otoridad in usa nga Chief Tanod ngan duha pa nga iba dida han mga COMELEC Gun ban Checkpoint ha magkalainlain nga mga lugar ha Sinirangan Bisayas hadin Enero 23, 2022.
Imbes nga hiya unta an susbaranan hin disiplinado nga mulopyo, an lider han tanod nga hi Erwin Rojas han Brgy Panabatan, Sta Margarita, Samar in nasikop han mga pulis tungod han alegasyon nga pakasupak niya han gun ban.
An 40-anyos nga Chief Tanod in nakuhaan hin kalibre 45 nga pistola, lakip in pito nga bala dida han checkpoint.
Samtang, didto naman ha Matalom, Leyte, nadakop gihapon ha pagdinaradara hin kalibre 38 nga revolver hi Gerry Gay, 27 anyos, residente han Brgy Sta Paz han mao nga bungto. Labot la han pusil, nakumpiskar gihapon tikang han suspetsado in upat nga bala.
An ika-tulo nga suspetsado nga nadakop hito nga petsa amo hi Jerome Plaza, 22 anyos, nag-uukoy ha Brgy 62, Sagkahan, Tacloban City. Hi Plaza in gindakop han makuhaan hiya hin pisaw.
An tulo nga mga suspetsado in iginpaslak ha mga karsel didto han ira tagsatagsa nga lugar ngan maatubang han kaangayan nga mga kaso.
Tikang ig-implementar an gun ban hadton Enero 9, porlomenos napulo na nga mga indibiduwal ha Rehiyon Otso an nagkasisikmit ha pagtalapas hini nga kamanduan han COMELEC. #
