Waray man unta ma apektuhi gud an siyudad han Tacloban kay ano nga makuri an mga transaction ha mga banko kahuma han pag lasurbo han bagyo Odette?
Damo an mga na reklamo mahitungod han ka “off line” han mga Automated Teller Machine “ATM” han pira nga mga banko sugad man han “over the counter” nga mga transaction han mga depositors.
May mga higayon nga limitado pa an kantidad han salapi nga pwede ma withdraw ngan an pag antos han ka halaba han pila para maka kuha hin kuarta labi na kay mag papasko na.
Gin sumat ni Mr. Francisco Barredo an presidente han Bankers Association of Tacloban ha interview han isumat.com nga an mga linya han komunikasyon labi na han Globe Telecom amo an hinungdan han ka apektuhi han mga transaction han banko ha siyudad han Tacloban mahitungod kay nagamit mangud hin internet an mga banko haira mga mga transaction.
Bisan kon deri sentro han bagyo an Tacloban mahitungod nga konektado man an mga linya han komunikasyon han siyudad han mga mga lugar nga gin lasurbo han bagyo ha Visayas ngan Mindanao na apektuhan an internet connection han mga banko labi na kon uusa la an internet provider han banko dugang pa ni Barredo.
Kon “offline” an depository bank pwede man pumakadto ha iba nga mga banko sugad han Bank of Commerce an mga depositors samtang nga waray pa mahibalik an normal nga signal han internet sumala pa kan Barredo.
Nag lalaum an Bankers Association nga maibabalik na ha normal nga serbisyo an mga linya han telecommunication company agud maibalik na liwat an normal nga serbisyo han mga banko. (Guila Isabela Cinco Rona)
