Isumat.com/Disyembre 24, 2021
Katapos hin unom ka adlaw tikang han pagtampalo ni Bagyo Odette, nahibalik na an operasyon han mga pantalan ha Surigao del Norte ngan Southern Leyte subay han pasamwak han Philippine Ports Authority (PPA).
Dida han impormasyon, ginklaro han PPA nga an pagbalik han operasyon kakulop, Disyembre 23, in hinay-hinay pala ngan deri pa ini Fully Operational sanglit puede pa magbag-o an mga eskedyul han biyahe han mga barko.
Kakulop han aga, nagtikang na pagbiyahe ha ruta nga Lipata-Liloan-Lipata an Fastcat M7, Sta Clara (Chartered trip), ngan LCT Star Asia. Dida hini nga ruta, alas 2 han maagahon an syahan nga biyahe ngan tobtob ini alas 6 han gab-i.
Ha luyo nga bahin, an mga barko han Montenegro Shipping Lines in mayda na gihapon biyahe tikang ha Lipata ngadto ha Benit Port, San Ricardo, Southern Leyte kada upat ka oras.
Nagpapadayon an PPA pag-ayad han mga nagkaguguba nga facilidadis han nasabi nga mga pantalan sanglit apektado an pag-eskedyul han mga biyahe han barko.
Ginatos-gatos nga mga biyahedor ngan sarakyan an stranded hin pira na ka adlaw dida hini nga mga pantalan tungod han grabe nga danyos han bagyo.
Kun manunumduman, an Regional Disaster Risk Reduction Management Office in nag-abiso hadin Mierkules ngadto han mga biyahedor tikang ha Luzon nga tikadto ha Mindanao nga deri la anay dumayon para kalikyan an pagtikadamo han napapa-aw nga mga pasaheros didto han mao nga mga pantalan. # ( Guila Isabela C. Rona)
