Isumat.com/Hunyo 10, 2021
Katapos hin pira ka semana nga waray na pag-istrikto ngan patakas nga sudoy-sudoy han katawhan, igbabalik an pagpadulot han mas mahugot nga General Community Quarantine ha bug-os nga Rehiyon Otso.
An Regional Inter-Agency Task Force (RIATF) an nagdesisyon nga tikang ha Modified General Community Quarantine (MGCQ), utro igpatuman an GCQ basi mapugngan an nagpapadayon nga pagsibrang han Covid-19 ha Eastern Visayas.
Kakulop, Hunyo 9, nahipatik in sobra 360 nga bag-o nga kaso han kagaw han rehiyon. Ini an gidadamu-i nga natapnan dida han kinada-adlaw nga report han DOH Regional Office yana nga tuig.
Hapagkayana, naabot ha sobra 1,700 an active cases ha bug-os nga rehiyon ug ngatanan nga probinsya ngan syudad in damo an nagkakatatapnan.
Nagsering an RIATF nga magpapagawas hira hin mga aludayday basi klaro kun ano an mga aktibidadis nga igindederi ngan tutugutan nga pagbuhaton han katawhan ha ilarum han GCQ.
Hapagkayana, kadam-an na nga mga LGUs han rehiyon in nagpatuman hin “granular lockdown” ha ira mga lugar.
An DOH-Regional Office in nagpahayag nga nakaka-alarma na ini nga paghinitaas han ihap han nagkakatatapnan ngan partikular nga ira gintutudlok an pagigin kampante han katawhan ngan deri pagsunod han minimum health standards nga amo an kawsa hini nga sirwasyon yana. #
