Isumat.com/Hunyo 9, 2021

Iginbuyagyag han Philippine National Police nga mayda na iginsalawad nga mga kaso kontra han mga kapulisan nga nahidabi dida han insidente kun diin namatay hi Calbayog Mayor Ronaldo Aquino ngan upat pa nga iba hadton Marso 8, 2021.

Ini an nasabutan dida han gindumara nga public hearing han senado yana nga adlaw (Hunyo 9) mahitungod hini nga panhitabo.

Ha notisya han Philippine Daily Inquirer, nagsering hi PNP Deputy Director for Operations Maj General Alfred Corpuz nga tulo ka ihap hin homicide ngan frustrated homicide nga mga kaso an iginsalawad ha Calbayog City Prosecutors Office hadton Abril 16. Ini nga mga kaso in kontra kanda Lt Col Sucayre, Major Tan ngan Lt Armesa tungod han kamatay ni Aquino ngan duha han iya kaupdanan.

Iginsumat gihapon ni Corpuz nga ginpasakaan hin murder case hi Mark Aquino (anak han alkalde), ug hi Cpl Rosales dara han pagkamatay nira Major Tabada ngan Sgt Laoyon. Gin-akusaran hira Mark nga amo an nagpusi han duha nga kapulisan.

Hi Mark Aquino in mahugot nga nagdiwara hini nga akusasyon.

An kampo ni Aquino in nagdidig-on nga gin-ambush hira han grupo han kapulisan, pero an PNP-Region 8 in nagsering nga misencounter an nahitabo ngan mayda lehitimo nga operasyon an mga operatiba didto han lugar hadto nga panahon.

Samtang ginsusurat ini nga report, nagpapadayon an hearing ha senado.#