Isumat.com/Hunyo 9, 2021
Usa nga maestra hin pampubliko nga eskwelahan an naawat an kinabuhi han mahidabi hin aksidente ha kadalanan an iya ginmamaneho-an nga motorsiklo ha Naval, Biliran hadin nag-agi nga adlaw (Hunyo 8, 2021)
Dida han imbestigasyon han Naval PNP Office, ginkilala an biktima nga hi Vivien Ann Estanislao, 34 anyos, ngan maestra ha Tabunan National High School.
Pasado alas 9 han gab-i, hi Estanislao in nagmamaneho han iya motorsiklo ngan nagsusulsog han kalsada ha Brgy Lucsoon. Tikadto unta an biktima ha poblacion Naval han tigda la nga bumangga ha iya in usa nga KIA Sportage Sports Utility Vechicle nga tikang han kaluyo nga lane han kalsada.
Nahilabog an biktima ha motorsiklo ngan nag-antos hin grabe nga karamtam ha lawas rason han iya kamatay.
Waray panginano-a han drayber han SUV an biktima, lugod ginpaspasan an iya pagpadalagan han sarakyan. Sumala han mga imbestigador, tungod han kamakusog han pagbunggo, natanggal an plaka han SUV ngan nahibilin dida han lugar.
Paghagos hin pito ka oras, sumurender an drayber han SUV ngadto ha Naval PNP Office. An suspetsado in ginkilala nga hi James Apacible, 29 anyos, public school teacher ngan residente han Brgy Lucsoon.
Nadiskubre dida han imbestigasyon nga antis pa mabunggo ni Apacible hi Estanislao, nag hit-and run gihapon an suspetsado ha Brgy Bato, Biliran, Biliran hadto nga gab-i. Mayda niya nabunggo nga nagmomotor nga lalaki ug iya ini ginbayaan ngan nagpadayon pagbiyahe tikadto ha Naval kun diin nabunggo niya an maestra.
An biktima ha bungto han Biliran nga lalaki in nag-antos hin injury ha tiil ug aadto pa yana ha hospital.
Nagpapadayon an kapulisan pag-imbestigar han nasabi nga panhitabo.#
