Isumat.com/Mayo 27, 2021
Unom nga kabablayan an na-ugbaw han sunog nga natabo ha Brgy Loyo, Basey, Samar hadin nag-agi nga adlaw.
Ha report han Basey-BFP, an mga nagkasusunugan hin balay amo an masunod: Aileen Tamayo, Nilo Gaddi, Dominga Mensones, Ruben Centinaje, Rustico Baclar Jr ngan Alfredo Ecalne.
Nagpahayag an BFP nga madagmit an paglarab han kalayo tungod kay hinimo-an hin light materials an kabablayan.
Porlomenos 220 Mil Pesos an kantidad han danyos dida han 39-minutos nga paglalahinggab.
Waray nahisumat nga namatay o nag-antos hin karamtan ha lawas dida han insidente nga padayon gin-iimbestigar han mga bumbero kun ano an hinungdan. #
