Isumat.com/Mayo 27, 2021
Nakatalaan nga igpadulot na liwat an mas istrikto nga pagkontrol han gi-os han katawhan ha Southern Leyte sunod nga bulan tungod han nagtitikahitaas nga ihap han nagkakamamatay tungod han Covid-19 didto han probinsya.
Dida han miting kakulop (Mayo 26) han Provincial Task Force on Covid-19, nagsering hi Governor Damian Mercado nga iya plano igbutang an lalawigan ha General Community Quarantine (GCQ) ha bulan han Hunyo. Hapagkayana, an bug-os nga Eastern Visayas in aada ha Modified General Community Quarantine (MGCQ), an gihabubu-i nga pantag han kwarentina ha Pilipinas.
Hi Mercado in nakatalaan magpagawas hin Executive Order kasumpay hini nga iya plano.
Nahimugso ini tungod han ka-alarma han Provincial IATF tungod han hitaas nga ihap han namamatay ha ira probinsya nga natapnan han kagaw. Nagsering hi Provincial Health Officer, Dr. John Matibag, nga yana nga 2021, umabot na ha 28 katawo an naawat an kinabuhi, samtang han 2020, upat la an tumalikod ha kadayunan.
Ha Covid Death Rate han bug-os nga nasud, naabot la hin 1.3%, pero ha Southern Leyte ini in 2 porsyento, pahayag pa ni Matibag.
Kun igpagawas an bag-o nga Executive Order, an mga Returning Residents in kinahanglan magdara hin negatibo nga resulta han RT-PCR Test ngan mayda Certificate of Acceptance tikang han natutungdan nga LGU antis makasulod ngadto han probinsya. Mag-i-istrikto na gihapon ha mga border checkpoints.
Kadungan hini, gin-aghat ni Mercado an mga LGUs nga mag-implementar hin “skeleton office workforce schedule” basi deri damo an tawo ha mga munsipyo.
Maghihimo gihapon hin pitad an pamunuan han probinsya nga madugangan pa an bed capacity han Salvacion Oppus Yniguez Memorial Provincial Hospital basi ma-akomodar an mga pasyente han Covid-19. # (w/ report from PIA-So. Leyte)
