Isumat.com/Abril 28, 2021
Dako an posibilidad nga mayda magkakamagtay nga kasundalohan ngan mga sibilyan kun waray madiskubre in usa nga hirimo-an hin bomba ngan posible gamiton an mahihimo nga paburuthon ha mga panggama ngan terorismo han New People’s Army.
Ha usa nga operasyon han Abril 26, 2021, an mga tropa han 14th ngan 93rd Infantry Battalion han Philippine Army in nakatara han nasabi nga facilidad han mga rebelde ha masighot nga lugar ha Brgy Patag, Ormoc City. Nadiskubre an kampo han mga kumunista kun diin may tunnel ngan didto ginhihimo an mga bomba.
Ugsa hini, an nagsurender nga rebelde nga hi alyas Saag in nagbuyagyag ha militar kasumpay han lokasyon han mao nga kampo. Hi Saag in anay kaapi han CPP-NPA ha ilarum han Regional Party Committee. Han iya pagsurender iya gihapon igintubyan in usa nga M-14 rifle ngan mga bala.
Gin-updan ni Saag an militar ngadto han lugar ngan didto nakit-an an ginbayaan nga mga higamit ngan materyales ha paghimo hin Improvised Explosive Device o IED.
Kasumpay hini, hi BGen Zosimo Oliveros, nga amo an nagunguna han 802nd Infantry Brigade, in nagpahayag nga klaro ini nga gintatalapas han mga rebelde an International Humanitarian Law tungod han ira bayolente ngan trinaydor nga mga aksyon basi igduso an magraot nga plano.
Iginkalipay gihapon ni Oliveros an pagsurender ni Saag kay ini in nagpapakita nga damo nga mga rebelde in nakasantop na han kasaypanan nga pag-api han NPA, ngan karuyag na hin mamurayaw nga kinabuhi.
Hi Saag in aada yana ha kustudiya han militar ngan ginpoproseso an mga dukumento basi makatagamtam hiya han mga benefecio tikang ha gobyerno. #
