Isumat.com/Abril 28, 2021
Ha tuig 2022, nakatalaan makatagamtam han tag 20 Milyones Pesos nga pondo han Barangay Development Program (BDP) in 200 nga barangay ha Sinirangan Bisayas sumala kan Myles Colasito, an Regional Information Officer han DILG.
Ha interview han iFM-RMN Tacloban, iginsumat ni Colasito nga dida han mga programa han National Task Force- Ending Local Communist Armed Conflict (NTF-ELCAC), an mga barangay nga nakatalwas na tikang ha presensya ngan impluwensya han kumunista nga New People’s Army in tatagan han mao nga pondo basi gamiton pagtindog hin mga proyekto ngan infranstraktura para han pagpadukwag han ira tagsatagsa nga kumunidad.
Han yana nga 2021, unom nga mga barangay ha Northern Samar an nakapahimulos han nasabi nga benefecio katapos la igdeklarar han NTF-ELCAC nga naka-alinggawas na hira han pagsamok-samok han mga rebelde.
Para han 2022, an mamalonan han pondo in 45 nga barangay ha Eastern Samar, 41 ha Leyte, 87 ha Samar, 23 ha Northern Samar ngan 4 ha Southern Leyte. An suma-total han pondo in 4 Bilyones pesos, pahayag ni Colasito.
Pero ini nga kalungganayan in namimiligro yana tungod han iginproponer hin pira nga senador nga bawi-on ini nga pondo han NTF-ELCAC ngan igbalhin para han mga panginahanglan pagsurapo han Covid-19 Pandemic.
Nag-ugat ini nga pitad han mga magbabalaud tungod han alegasyon nga “Red-Tagging” o pagbansag nga mga kumunista an mga personalidad nga nag-organisar han mga community pantries. Sumala han mga senador, deri matadong nga an NTF-ELCAC in mag-giginastuson hin dako nga pondo tapos aakusaran nga mga kumunista an nagpapaluyo han pantries nga an intensyon an pagbulig han igkasi tawo nga naghihimakuri.
Nagsering hi Colasito nga kun matatabo ini, dako ini nga kaperdehan ha mga barangay nga nag-uungara hin kauswagan ngan mapipi-ang an mga plano para han mga proyekto. Matoud, ginklaro niya nga waray mahihimo an DILG kun magmalinangpuson an mga senador nga balabgan ini nga pondo.
Kadungan hini, hira Matuguinao, Samar Mayor Aran Boller ngan Silbino Lobos, Northern Samar Mayor Leo Jarito in deri nauyon han plano han mga senador. Sering han duha nga alkalde, dako an mawawara nga oportunidad han tay-aw nga mga barangay para makatilaw hin progreso.
Hi Boller in nagsaysay nga deri angay igbalhin ha Covid-19 Response an pondo han NTF-ELCAC kay darudamo nga kinabuhi an nadidistroso ha mga barangay tungod han pagsinamok han mga rebelde kontra han namamatay dara han Covid-19. # (with report from PNA)
