Isumat.com/10:45AM, Marso 4, 2021
Siyam nga kabataan tikang ha Surigao an nasalbar han mga kapulisan ngan personales han LTFRB-Region 8 tikang hin gin-aalegar nga mga child traffickers samtang iginbibiyahe an mga biktima tikadto na unta ha Luzon.
Dida han report tikang ha PNP Regional Office, an Palo Leyte Municipal PNP Office in nakakarawat hin tawag ha telepono tikang ha San Agustin, Surigao del Sur PNP Office. Ini in mahitungod hin impormasyon nga mayda van nga narekupo an LTFRB Enforcers ha Paranas, Samar. Subay pa han impormasyon, sakay dida han van an siyam nga menor de edad.
An LTFRB an naka-intercept han PUV didto ha Paranas hadton Marso 3 tungod kay colurom ini ngan supak ha balaud an iya pagbiyahe. Gindara ha LTFRB Regional Office an sarakyan upod na an mga pasaheros ngan drayber.
Tungod han koordinasyon han Surigao del Sur PNP, Palo PNP ngan LTFRB natalwas an siyam nga kabataan nag-eedad tikang 13 tobtob 17 anyos. Lima ha ira an kababayen-an ngan upat an kalalakin-an.
Dida han imbestigasyon, an kabataan in ngatanan nag-uukoy ha Brgy Sto Nino, San Agustin, Surigao del Sur.
An mga suspetsado in ginkilala nga hira Marialina Vasquez, 51 anyos, taga Villa Alfredo Resort ha San Fernando City , Pampanga; ug hi Gerard Tebale, 25 anyos, nag-uukoy ha lugar han kabataan ha Surigao.
An nag-recruit han kabataan amo hi Vasquez ha bulig ni Tebale. Dida han ka-intercept han van, hi Vasquez in nadakop kay upod hiya han kabataan, samtang hi Tebale in ginhahalpat pa ha Surigao.
Nagsumat an kabataan nga gin-recruit hira nga magtrabaho didto han resort ha Pampanga kun diin 7 Mil pesos an iginsaad nga sweldo kada bulan.
An mga menor-de edad in gintitimangno yana han Leyte DSWD ug nakikigsumpayan ha DSWD-Surigao del Sur para han kaangayan nga disposisyon han mga biktima. #
