Isumat.com/8:45AM, Pebrero 27, 2021
Duha nga suspetsado ha iligal nga droga an nagkadadakop ha magkalain nga operasyon han PDEA ngan PNP ha Eastern Samar hadin nag-agi nga duha ka adlaw.
Dida han gab-i han Pebrero 26, an mga elemento han PDEA ngan PNP ha Sinirangan Samar in nagkaada hin operasyon ngan ira nakwelyuhan an suspetsado nga hi Marianne Nicole Labide ha Brgy D-1, Borongan City.
An suspetsado in bag-o nga natudlok nga drug personality ngan nakumpiskar ha iya in duha ka sachet hin gintotoohan nga shabu ngan usa ka sachet hin marijuana.
Didto naman ha San Policarpo, nadakop an suspetsado nga hi Francis Macabini, 43 anyos, ngan nag-uukoy ha Brgy 4 han nasabi nga bungto. Hiya in na-aresto durante han buy-bust operation han kapulisan ha Brgy Baras hadin Pebrero 25 han kulop. Nakuha tikang ha iya in tulo ka sachet han gin-aalegar nga shabu ug an buy-bust money.
Ha iba nga panhitabo, tulo nga anay kaapi han rebelde nga NPA an sumurender ngadto han mga kapulisan ha Northern Samar hadin Pebrero 24. Hira in ginkilala nga alias Ingko/Diego, 32 anyos, taga Silvino Lobos ngan miembro han SRC-Emporium; alias Ningning, 52 anyos, taga Catarman, kaapi han SRC Emporium; ngan alias Kanor, 24 anyos, taga Catarman ngan miembro han SRC Levox.
Ira igintubyan ha mga otoridad in usa nga m-16 rifle, usa nga kalibre 45, usa nga rifle grenade, mga bala ngan magazines. #
