Isumat.com/6:12AM, Pebrero 20, 2021
Suspendido ha trabaho ngan waray kakarawaton nga sweldo an duha nga magturutdo ha Tacloban City nga nagka-aaresto ha magkalain nga buy-bust operation hadin nag-agi nga pira ka adlaw.
Hi Dr. Nilo Eder, an tagpamulong han DepEd Tacloban City Division. in nagpahayag nga suspendido na ha trabaho ngan waray kakarawaton nga sweldo samtang nagseserbe han suspension an maestro ug an maestra han pampubliko nga eskwelahan nga nagkadadakop tungod han alegasyon nga nagdadabi han iligal nga droga.
Kun manunumduman, hadton Enero 31, usa nga maestro an nadakop ha Siren District ngan dida han Pebrero 15, usa liwat nga maestra an nasikmit ha Abucay.
Ini nga panhitabo in duro nga iginkakabido han ahensya tungod kay imbes nga magigin modelo hin maupay nga susbaranan, nagin maraot lugod an ladawan han duha nga titser, pahayag pa ni Eder.
Ginklaro pa niya nga deri tatanggalon ha serbisyo an duha nga personales kay waray pa man pinal nga desisyon an korte han ira tagsatagsa nga kaso. Tungod hini, deri makuha hin bag-o nga empleyado an City Division kay an trabahoon han duha nga titser in igbabatag-batag la ha iba nga magturutdo.
Gin-iistudyuhan gihapon han ahensya kun sasampaan hin reklamo administratibo an duha nga personales.
Igindugang pa ni Eder nga an City Division in maghihimo hin mga pitad basi deri na mautro ini nga panhitabo. Aminado an opisyal nga nagkulang an ira ahensya hini nga isyu han droga kay nakatutok hira ngadto ha mga estudyante nga deri gumagad han bisyo, ngan waray lugod mga pitad o pag monitor kun mayda mga empleyado an nalalambigit han iligal nga droga.
Makikigsumpayan gihapon an ahensya ha iba nga opisina han gobyerno dida han ira bubuhaton nga mga plano ha panuyo nga waray na DepEd Personnel nga mahikanit hini nga bisyo. #
