Isumat.com/7:58AM, Pebrero 1, 2021
Usa nga empleyado ha gobyerno ngan tulo pa nga iba an pinansikmit han mga otoridad dida hin magkalainlain nga operasyon han Philippine National Police ha Eastern Samar hadin nag-agi nga pira ka adlaw, subay han report tikang han PNP han nasabi nga probinsya.
An mga elemento han Eastern Samar PNP Provincial Office ngan Dolores Municipal PNP Station in nagdumara hin operasyon pinaagi han Search Warrant nga gin-isyu han RTC-Branch 4, ngan ira nadakop an magtala-amay nga hira Romulo Pajaroja, 58 anyos, empleyado han Provincial Engineering Office; ug an iya anak nga hi Reynaldo Pajaroja, 31-anyos, waray asawa ngan waray trabaho.
Nakuha han mga otoridad ha balay han mga suspetsado ha Brgy 1, Dolores, Eastern Samar in usa nga kalibre 38 nga waray serial number, usa nga kalibre 45 nga may serial number 1254870, 20 nga mga bala han kalibre 45, lima nga bala han kalibre 38 ngan tulo nga magazine para han kalibre 45.
Samtang, hadin Enero 28, naghimo gihapon hin operasyon an mga otoridad ha Brgy Factoria, Oras, Eastern Samar kun diin nadakop an suspetsado nga hi Jordan Cesista, inasaw-an, parag-uma ngan residente han mao nga lugar.
Narekupo tikang kan Cesista in usa nga kalibre 38 nga pistola, mga bala ngan matarom nga armas.
Hadton Enero 29, na-aresto naman han mga tinubyanan han balaud an suspetsado nga hi Fernando Muyano alyas Mulawin, 53 anyos, inasaw-an ngan nag-uukoy ha Brgy Alangalang, Borongan Eastern Samar.
An mga otoridad in mayda search warrant iginpagawas han MCTC-Llorente ngan ira nakuha tikang han suspetsado in usa nga kalibre 45 nga mayda serial number 1424214, usa ka magazine hin kalibre .40, ngan mga bala para hin kalibre 45, kalibre 38, ngan kalibre 357.
An mga suspetsado in aada ha kustudiya han kapulisan ngan nakatalaan pag-atubang han mga kaso kontra ha ira.
Ini nga mga pitad han Eastern Samar PNP in kaparte han ira kampanya kontra han magraot nga elemento han sosyedad. #
