Isumat.com/8:53AM, Enero 28, 2021
Waray na ha kustudiya han kapulisan hi Alangalang, Leyte Vice Mayor Edwin Jumadiao katapos niya makagpiyansa han kaso nga iginsampa kontra ha iya.
Hadin nag-agi nga adlaw, hi Jumadiao in nahisumat nga ginserbehan han Arrest Warrant han mga pulis han nasabi nga bungto tungod han kaso nga Usurpation of Official Functions. Nagpiyansa naman dayon an Bise-Mayor han igintalaan nga 30 Mil pesos nga bail bond.
Sumala han report, ini nga kaso in nag-ugat hadto pa han Marso 2017 kun diin gin-alegar han complainant nga nagpanlalapos han iya poder hi Jumadiao han iya igmando nga pa-undangon an pagdumara hin derby ha gallera han munisipalidad.
An Alangalang Sports Complex and Gallera, Inc ha pagtaglawas ni Lowell Marmita an nagsalawad han reklamo ha Leyte Prosecution Office. Igin-alegar han tagreklamo nga hi Jumadiao in pumakadto han bulangan ngan ginpa-undang an derby tungod kay waray permit.
Hadto nga takna, hi Jumadiao in miembro han Sangguniang Bayan komo konsehal ngan Chairman han kanan konseho Committee on Games and Amusement.
An akusado in usa nga abogado ngan residente han Brgy Canvertudes, Alangalang, Leyte. Hiya an nagdaog ka Vice Mayor hadin 2019 Elections.
Dida han programa nga Straight to the Point ha iFM-RMN Tacloban yana nga adlaw (Enero 28) mahugot naman nga pinanhimuwa ni Jumadiao nga gin-aresto hiya. Dida han iya text message, iya gin-esplikar nga an iya ginbuhat in “Voluntary Surrender.”
Sumala ha iya “formality” nala adto basi makagpiyansa hiya. Iya pa igindig-on nga “OK” na hiya ug han nagsampa han reklamo. #
