Isumat.com/7:30AM, December 29, 2020
Mahugot nga igindederi an pagpabuto hin armas de fuego ngan iligal nga mga paburuthon ha panahon han Kapaskukan ngan pagtapo han bag-o nga tuig, pero damo la gihapon an deri nasugot hini nga patakaran.
Sanglit, an Tacloban City PNP ha panguna ni Chief of Police Col. Michael David in naghimo hin kadugangan nga pitad basi kabalabgan ini nga mga aktibidadis nga nagdudurot hin peligro ha kinabuhi ngan propyedad. Ini in pinaagi hin premyo nga salapi para hin makaka-litrato o makakag-video hin nagpipinabuto hin pusil o illegal firecrackers.
Nagpahayag hi Tacloban PNP Spokesperson Capt. Marjorie Manota nga nanlimbasog hi David nga makahikay hin pondo para hini nga panuyu-anan. Makaka-agom hin 10 Mil pesos an hin-o man nga makakakuha hin litrato o video han mao nga mga insidente kun mayda magbubuhat hini denhi ha Tacloban.
Pero ginklaro ni Manota nga kinahanglan aangkunon han indibiduwal nga hiya an nagkuha han litrato o video pinaagi hin affidavit o sinumpaan nga pahayag. Kinahanglan andam gihapon pagtestigos ha korte an nasabi nga indibiduwal.
Kadungan hini, malipayon nga iginpasamwak ni Manota nga waray firecraker-related injuries nga nahipatik ha Tacloban dida han pagtigaman han Pasko ngan naghihinaot gihapon hiya nga sugad ini an magigin kahimtang ha pagtapo han bag-o nga tuig. #
