Isumat.com/9:01AM, December 29, 2020

“Waray ginpapatamakan ngan malisyoso an report han Presidential Anti Corruption Commission (PACC) nga naglalakip han akon ngaran.”

Ini an igindig-on ni Congressman Paul Daza, tinaglawas ha kongreso han syahan nga distrito han Northern Samar, komo reaksyon han pahayag ni Presidente Rodrigo Duterte nga upod hiya ha listahan han PACC nga gin-iimbestigar tungod hin alegasyon nga anomaliya ha pondo han DPWH.

Sumala kan Daza, an nagpapaluyo hini nga taktika pagdum-it han iya pagkatawo amo an iya pangontra ha pulitika ngan mga kontraktor nga iya na hadto iginbuyagyag nga nagsalikway ngan waray igpadayon an mga proyekto. Nabulos la hira ha akon, dugang pa ni Daza.

Ini nga nagpapakaraot ha akon yana amo in blacklisted na ngan deri na nakaka-api ha mga bidding hin proyekto ha DPWH, sanglit nagpadangat hira hin malisyoso nga mga akusasyon ha PACC, pahayag han magbabalaud.

Gintagan hin duon ni Daza nga komitido hiya para hin hapsay ngan tangkod nga pangobyernuhan ngan tim-os an iya suporta han kampanya han Presidente kontra han pangurakot. Iya liwat iginpatapod nga deri hiya malikay han imbestigasyon nga pagdudumaraon basi malimpyuhan an iya ngaran.

Hi Daza in lakip han porlomenos walo nga congresista nga pinanngaranan ni Duterte nga aada han lista han PACC nga may reklamo hin pakigkuntsaba ha mga opisyales han DPWH ha ira tagsatagsa nga distrito.

Hi Daza in kaapi han Partido Liberal ug an iya amay nga hi anay Cong. Raul Daza in nagin presidente han partido. #