Isumat.com/11:03PM, December 12, 2020
Tumalikod ha kadayunan an Chief Medical Technologist han laboratoryo han Eastern Visayas Regional Medical Center (EVRMC) han mahidabi hin aksidente an iya sinasakyan nga kotse ha Kananga, Leyte, Disyembre 12 han kulop.
Subay han impormasyon nga nahikay han Isumat.com, banda alas 3 an takna, an Toyota Vios nga sinasakyan ni Virgilio “Bing” Hubilla, Chief Medtech han EVRMC Laboratory; ngan Beinvenido Menoc, drayber han sarakyan in nagsusulsog han kahilab-an han National Highway ha Brgy Montebello. Hira in tipa-uli na ha Tacloban City.
Nagmani-obra hi Menoc pag-ensima hin trak, pero hadto nga takna mayda liwat kotse ha kaluyo nga lane nga iginkakasugat han sarakyan nira Hubilla. Naningkamot paglikay hi Menoc pero nawarayan na espasyo ngan sumampak hira hin nakaparada nga dump truck ug nagbanggaay pa han kotse nga iginkakatapo. IGindugang pa han impormasyon nga hadto nga oras, madalunot an kalsada kay mauran didto han lugar.
Hira Hubilla ngan Menoc sugad man an drayber han usa nga kotse in kadagmitan gindara ha usa nga hospital ha Kananga pero gindeklarar han Attending Physician nga Dead on Arrival hi Hubilla.
Hinsabutan nga an nagmamaneho han iginka-enkwentro nga kotse amo hi Fr. Gregorio Bunales Jr, Kura Paroko han St. Isidore Parish ha Merida, Leyte. Hira Bunales ngan Menoc in nakasalbar han aksidente. Hi Bunales in iginbalhin ha pribado nga hospital ha Ormoc ha pagpadayon han pagtambal.
Kasumpay hini, duro an kabidu-an yana han Medical Community ha Sinirangan Visayas labi na an mga ka-urusa han 57-anyos nga hi Hubilla ha EVRMC. Kadam-an na nga mga personales han laboratoryo an natutdu-an ni Hubilla han mga estratehiya ngan pamaagi pagproseso han mga samples nga gindadara ha laboratoryo. Porlomenos 36-anyos na nga nagtatrabaho ha EVRMC an taga Tanauan, Leyte nga hi Hubilla.
Hi Bing amo an usa gihapon han naningkamot nga magkaada hin Covid-19 Laboratory an EVRMC, an gisasyahani nga facilidad han pagproseso han swab samples han rehiyon. Hiya an nangunguna han pag-analisar han mga swab samples nga gindadara ha EVRTC yana nga panahon han pandemya.
Labot la han iya trabaho ha EVRMC, ginkokonsiderar gihapon nga dako an iya kontribusyon nga maseguro an “Quality Assurance” han magkalainlain nga medical laboratories ha Eastern Visayas. Dida hini nga iya obligasyon, kadam-an nga MedTech ha mga RHU ngan hospital an naka-angbit hin kina-adman tikang kan Hubilla.
Hi Hubilla in nagtutdo gihapon ha St Scholastica Medical School ha larangan han Medical Technology. #
