Isumat.com/6:03AM, December 14, 2020

Waray lugar para han kumunista nga New Peoples Army an tagsatagsa nga mga Local Government Units (LGU) ha Sinirangan Bisayas.

Haros ngatanan na nga LGUs han rehiyon an nagdeklarar nga sarado an ira portahan para han mga rebelde ngan waray lugar an ira ginhihimo nga panarhog ngan kasamok. Ini nga mga LGUs in nag-aprobar hin mga resolosyon para hini nga panuyu-anan.

Dida han 136 nga municipalidad han rehiyon, 134 na an nagpasa hin resolosyon, samtang an ngatanan nga probinsya ngan syudad in nagtangdo na han ira tagsatagsa nga resolosyon.

Hadin Disyembre 11, an Regional Peace and Order Council ha panguna han Chairman han konseho nga hi Eastern Samar Governor Ben Evardone, in nagpalusad hin resolosyon nagmamando ha tanan nga Local Chief Executives nga igdeklarar an mga rebelde nga kumunista komo persona-non-grata.

Ini in may panuyo nga igpakita an mabaskog nga panindugan han rehiyon basi mapukan na an walhon nga kagi-usan ngan humugpoy na an aragway ha butnga han militar ug han NPA.

Kadungan hini, mahugot nga pinanhimuwa ni DILG Secretary Eduardo Ano an mga sumat-sumat nga ginpipirit han National Government an mga LGUs nga igdeklarar nga persona-non-grata an NPA. May mga impormasyon nga nagkagawas nga iibanan o pag-uulang-ulangon han gobyerno an pondo para han mga LGUs kun deri sumugot.

Nagsering hi Ano nga dako ini nga buwa ngan pagpakaraot la ini han mga kumunista. Ginklaro han mangulo han DILG nga deri mga owat an mga lokal nga opisyales ngan takas na hira han pan-abuso ngan pagsinamok han mga rebelde.

Nagsering pa hi Ano nga kaangayan la ini nga pitad kay sobra na 40 Mil an nagkamamatay nga sundalo, kapulisan ngan sibilyan tungod han 50-anyos nga waray hangkag nga pakigbisog han kagi-usan kumunista kontra han gobyerno.

Pira naman nga mga nitezens an nagpagawas hin reaksyon ha social media kasumpay hini. Sering nira nga waray gamit ini nga deklarasyon kay may mga local officials nga nasuporta han NPA ug an iba ha ira nahatag pa hin kwarta ha mga rebelde basi makagkampanya ha tay-aw nga mga lugar ha panahon han eleksyon. #